Chandrexa organiza un campamento de verán

O Concello de Chandrexa de Queixa pon en marcha un campamento de verán destinado a nenos e nenas de entre 4 e 14 anos, que se desenvolverá durante os meses de xullo e agosto.

A actividade terá lugar de luns a venres, en horario de mañá, de 10,00 a 14,00 horas, e contará cun máximo de 11 prazas dispoñibles.

O campamento busca ofrecer unha alternativa lúdica e educativa durante o período estival, combinando xogos, actividades ao aire libre e aprendizaxes compartidas, sempre nun ambiente seguro e adaptado ás idades participantes.

O prazo de inscrición está aberto desde o pasado 16 de xuño ata o 26 de xuño. As solicitudes deberán ser realizadas polos pais, nais ou titores legais, ben a través da Sede Electrónica do Concello ou de forma presencial nas oficinas municipais.

As prazas cubriranse por orde de inscrición, tendo preferencia os nenos e nenas empadroados en Chandrexa de Queixa. A ficha de inscrición estará dispoñible na Sede Electrónica do Concello.