Nova zona de uso recreativo en Celeiros

A conselleira de Vivenda e Planificación de Infraestruturas, María M. Allegue, asinou co alcalde de Chandrexa de Queixa, Francisco Rodríguez, o convenio para executar a humanización dunha parcela municipal en Celeiros, onde se creará un espazo peonil con zona verde e unha edificación para uso recreativo. A Xunta investirá máis de 165.000 euros, o 70 por cento do orzamento, asumindo a execución das obras, mentres que o Concello achegará algo máis de 70.000 euros.

As actuacións permitirán crear un novo punto de encontro para a veciñanza, con espazos pensados para feiras, actividades ao aire libre, lecer ou uso das persoas usuarias da residencia de maiores. Ademais, incluiranse mobiliario urbano, zonas axardinadas, aparcabicis e iluminación led, integrando a nova infraestrutura coa contorna natural e urbanística do lugar.

O edificio de uso recreativo deseñarase con materiais que favorezan a súa integración paisaxística e permitirá acoller actividades mesmo en días de choiva. O proxecto completarase coa instalación dun sistema de saneamento e dunha varanda que comunicará os distintos espazos e enmarcará as vistas ao encoro. O prazo de execución previsto é de cinco meses.