Coles mostra a súa riqueza natural e gastronómica

Preto de medio centenar de persoas procedentes de distintos puntos da comunidade galega participaron esta fin de semana na actividade “Coñece e saborea Coles”, organizada por Adercou e o Concello. Ao longo da mañá do domingo os visitantes puideron descubrir os recursos que ofrece o concello. A primeira proposta consistiu nunha ruta interpretativa de Coles.

O roteiro comezou na Igrexa medieval de San Eusebio da Peroxa, pasando logo polas fincas do Pazo do Bamio e da Casa Grande de Lagariños. Tamén se percorreu o sendeiro do bosque de carballeira que comunica as aldeas de Mira de Cima, Ferreiros e A Torre, así como un tramo do pequeno canón do río de A Barra, que nalgúns puntos ofrece fermosas vistas sobre o val do río Miño ao seu paso polo concello de Coles. Logo dun percorrido de 11 quilómetros e medio, os participantes regresaron ao punto de inicio.

Foi alí, Reitoral de San Eusebio, onde puideron gozar dunha degustación e feira de produtos locais, grazas á Adega Vides Singulares e en colaboración do Concello de Coles. Os participantes, que chegaron dende lugares como Vigo, Marín ou Santiago, quedaron marabillados co entorno e tamén cos produtos que ofrece a localidade.