A Banda de Vilanova festexa 160 anos de música popular

A Banda de Música de Vilanova dos Infantes recibirá o vindeiro sábado en Ramirás o Premio Rebulir da Cultura Galega no seu 160 aniversario polo seu legado cultural na música popular. Un recoñecemento a unha das decanas das bandas galegas, que acumula unha longa e exitosa traxectoria que hoxe manteñen con paixón e dedicación preto de 40 músicos nativos de Vilanova, pero tamén doutros puntos da bisbarra de Terra de Celanova. "É un aniversario en uns tempos difíciles para a música", recoñece o seu director, Benito Villar, quen explicou como decidiron aprazar a programación do aniversario, "esperando que o próximo ano se poida celebrar dunha maneira máis solemne".

A orixe do colectivo musical remóntase ao ano 1860 cando dúas charangas do pobo, a do "Farruco" e a do "Tío Higinio", decidiron xuntar os seus esforzos para constituír un novo colectivo. A partir de aquí, e destacando que no nacemento desta banda tivo moito que ver a figura lendaria de Secundino Feijóo Mendez, o vello patriarca do Circo Feijoo, arranca un relatorio importante de directores que foron enriquecendo a banda, tanto coa súa achega directora como a través de importantes composicións como a muiñeira "O por do Sol" de Bernardo Cortés, o pasodoble "Los siete Infantes" do mestre Jesús Vázquez ou "Salve aviadora" de Don Benito de las Cuevas López.

Nesta longa traxectoria, a banda atravesou momentos de crise como no 1936 coa Guerra Civil "o que supuxo unha perda importante de efectivos e, polo tanto, unha pausa na actividade cotiá da Banda, ata o punto de non dar conseguido un director", lembra Villar, quen fixo un extenso traballo de documentación sobre os directores destes 160 anos, á vez que reivindica un maior apoio para a música.

Benito Villar: “Debemos loitar polo importante papel da música na sociedade"

O mestre Benito Villar rexe, dende comezos do 2011, os destinos musicais da Banda de Vilanova dos Infantes. Actividade que compaxina coa dirección da coral municipal de A Bola e a dos Amigos do acordeón das Terras de Celanova.

Como recibiron o premio?

A verdade é que non o esperábamos, foi unha grata noticia. Entendo que sempre é unha honra recibir un premio, cando máis se relaciona co traballo realizado durante 160 anos.

Que significa a banda para a veciñanza de Vilanova?

É un símbolo de identidade para Vilanova e para toda a comarca. Dende a súa constitución ata a actualidade, soubo conquistar un espazo fundamental no seu contorno.

Como afectou a pandemia ás bandas de música?

A pandemia é obvio que nos afectou dun xeito moi notable. Notámolo xa dende marzo, coa cancelación das festas, e co propio medo da xente, totalmente razoable, de asistir a un concerto aínda que ofreza medidas de seguridade. É difícil resolver estes problemas desde unha sociedade musical. Quizais deberíanse dar máis axudas ás sociedades musicais, á cultura en xeral. No noso mundo, nos alimentamos por dicilo de algunha maneira, dos actos que facemos e, agora que se reduciron tanto, a situación é complicada.

Como ve o futuro ?

Algo que nos debería consolar é que esto é unha época, un momento difícil, pero que ao final acabará pasando. Todo volverá e as bandas volverán encher as rúas e festas de música, e os músicos farano con máis alegría e ilusión que nunca. Porque a música é un ben necesario para manter o noso espírito no mellor estado posible e porque a música é algo que nos acompaña todos os días. Debemos apoiala para que siga medrando e non se perda. Por todo isto, e moito máis, a música é algo que debemos coidar. Debemos loitar polo seu importante papel na sociedade.