O BNG de Ramirás ve “nefasta” a xestión do campamento de verán

O grupo municipal do Bloque Nacionalista Galego no concello de Ramirás presentou onte unha moción na que sinalan a “errante, nefasta e disparatada xestión do campamento de verán da alcaldesa Isabel Gil baixo o paraugas do Programa Corresponsables”.

Para os nacionalistas, a solicitude do campamento de verán foi realizada “para un reducido grupo de cativos, deixando a un elevado número deles fóra”. Ademais, sinalan que non se publicaron as bases de selección “ata despois da criba inicial e o comezo do campamento”.

Porén, esta selección seguiu criterios “que presumimos a dedo, e de acordo ás bases publicadas, a metade dos seleccionados debería quedar fóra, mentres que moitos dos que foron excluídos, deberían ser seleccionados”.

Bastaría coa “vontade” dos partidos do grupo do goberno, PP e PSOE, para “resolver o problema mediante a contratación dun monitor suplementario”.

Falta de financiación

Para a alcaldesa de Ramirás, Isabel Gil, o problema xurde porque o Concello “probablemente non vai recibir este ano a subvención do Concilia Verán da Xunta”.

Sen embargo, lembra que ata agora e durante cinco anos, os cativos do pobo desfrutaron de “dous meses de campamento de verán totalmente gratuíto”, pero o aumento de rapaces máis a falta de financiación “dificultan esa duración para todos este ano”.