O CIM da Mancomunidade de Verín ofrece dez bolsas para que nais e fillos estreiten lazos

O Centro de Información á Muller (CIM) da Mancomunidade promociona por sexto ano consecutivo o seu “respiro familiar”, un tipo de experiencia onde as nais e as súas crianzas comparten actividades ao aire libre, fomentando os vínculos familiares e ocio de calidade, e para a que ofrece dez bolsas.

O programa aposta por actividades para compartir xuntos, como sendeirismo, actividades acuáticas, xogos de equipo e talleres, así como oportunidades para socializar e compartir entre as familias participantes. O obxectivo é que as mulleres podan crear redes de apoio e compartir espazos seguros.

Unha parte importante é a equinoterapia, terapia asistida con cabalos, onde traballan o vínculo pero ademais se convida ás familias ao traballo en equipo, resolución de problemas, educación emocional, empatía e socialización. Outros obxectivos son pasar tempo ao aire libre e desconectar do móbil.

Presentación de candidaturas

As nais empadroadas nos sete concellos da Mancomunidade poderán ofrecer a súa candidatura elas mesmas enchendo un formulario na web mancoverin.es ou nas redes sociais @mancoverincim.

Esta iniciativa conta co apoio dos Concellos, a Consellería de Política Social e Igualdade da Xunta de Galicia e Fondos da Unión Europea.