O colexio de Cualedro terá unha aula de polo creativo antes do fin de ano

ESPAZO DE APRENDIZAXE TECNOLÓXICA

O colexio de Educación Infantil e Primaria (CEIP) Vicente Risco de Cualedro está a renovar e rehabilitar unha aula situada no primeiro andar, co fin de que acolla un novo espazo que se dedicará unica e exclusivamente ao polo creativo do centro

Espazo en obras que albergará o futuro polo creativo do CEIP Vicente Risco de Cualedro.

Os polos creativos son aulas educativas innovadoras, dotadas cun equipamento especial, e que permiten aprender toda unha serie de novas artes e técnicas aos alumnos: intelixencia artificial, impresión 3D, tecnoloxías de control de ordenadores, robótica, electromecánica, equipos de imaxe e son. Todas apredizaxe debe ser manual e interactiva.

No seu momento o Vicente Risco xa fora pioneiro en formar parte dos polos creativos da Xunta, no marco do Plan Proxecta, ao que se incorporaron dende o seu inicio. Debido a ese compromiso, o centro de Cualedro está catalogado como “Polo Creativo +”.

Sen embargo, agora un dos requisitos do ente autonómico é que dispoñan “dunha aula exclusiva para ter todo o material e traballar aí, que tamén debe estar aberta a pais e nais, para que toda a comunidade educativa poida facer talleres nese espazo”, explica a directora, Mercedes Iglesias.

Arredor de 25.000 euros

As obras, que deben estar rematadas antes do fin de ano, contan cun orzamento de 24.471,62 euros, financiado polo servizo da unidade técnica de Ourense, dependente da Consellería de Educación, Ciencia, Universidades e Formación Profesional.

Contenido patrocinado