Os contos de Vicente Risco marabillan aos nenos de Cualedro

Os alumnos do Centro de Educación Infantil e Primaria (C.E.I.P.) Vicente Risco de Cualedro non sabían por que foran convocados na biblioteca. O único que lles dixeran era que terían visita e máis nada, polo que a expectación era máxima entre os rapaces.

Á hora acordada, a porta abriuse e alí apareceu puntual unha muller cargada cunha maleta antiga. A cativada puido por fin coñecer a Elvira Bao, mestra coruñesa que, xunto co seu marido, Bernardino Varela, encargara a Vicente Risco tres contos en 1921: “O Rei avarento”, “O labrego e máis o Rei” e “A dona encantada”.

Tres das historias fundacionais da literatura infantil en lingua galega, un pretexto hai máis de cen anos para manter daquela viva a lingua a través dos máis novos.

Co mesmo propósito, pero un século máis tarde, a educadora ambiental e escritora infantil Inma Soto meteuse na pel da neta de Elvira Bao durante unha hora, e foi pouco a pouco introducindo aos alumnos de Primaria no mundo destes contos que Risco creou seguindo a tradición popular galega.

Unha actividade na que Soto foi quen de sumerxir a máis de vinte rapaces de distintos cursos nun universo de fantasía, habitado por reis, moinantes, princesas e bestas, pero nunha época na que o galego estaba perseguido, usando unicamente a narración oral. Malia todo, preguntados por se querían escoitar algunha historia máis, a resposta dos cativos foi unánime: “Si, outro conto!”

A única condición que lles puxo a contacontos foi que “protexeran, coidaran e usaran a lingua galega”. Un patrimonio que a Fundación Vicente Risco trata de pór en valor a través de actividades como esta, “Os marabillosos de Risco”, en colexios de Galicia vencellados á biografía do escritor, político e intelectual, a piques de cumprirse 140 anos do seu nacemento.

Autora infantil

Inma Soto, nada en Ourense pero establecida en Xermade, afirma que atopou no conto “unha ferramenta para o meu traballo como educadora ambiental, para defender o noso patrimonio natural, pero tamén para trasladarlle á nosa lingua e cultura á infancia”.

No 2022 acabou por unir ambos mundos coa publicación de “Xela, a superheroína da aldea”, un libro infantil escrito por ela e ilustrado por Clara Cerviño, co que quixo “empoderar aos nenos e nenas do rural e que se sentiran orgullosos do galego, algo que os fai únicos”.