O comercio local de Verín mellorará a súa competitividade e dixitalización

A Asociación de Empresarios de Verín (Aever) e Abanca veñen de poñer en común un novo acordo de colaboración co obxectivo de seguir mellorando a competitividade dos negocios de proximidade a través do financiamento. Esta nova alianza pon o foco no acceso ao crédito en condicións vantaxosas, no impulso á dixitalización dos negocios e nas solucións que faciliten aos clientes o pago das súas compras.

Así o confirmaron Santos Álvarez, presidente de Aever, e María José López, directora de zona de Abanca en Ourense, coa firma do convenio nas oficinas de Aever. “Este novo acordo reforza o compromiso da entidade financeira coas empresas de Verín e, de xeito específico, permite que os adheridos á asociación poidan acceder a fórmulas de financiamento e solucións de dixitalización e de pago adaptadas”, anotaron os representantes das entidades.