Conta atrás para que o Carqueixa Rock encha Laza de música folk

O Carqueixa Rock é un evento de balde que naceu no 2012 como un festival musical que reivindica a cultura fóra das grandes cidades, neste caso na aldea de Souteliño, en Laza.

Tras anunciar a participación da banda bretona Gwendal, dos verineses da Banda de Gaitas Nova Era, dos coruñeses Breo e do grupo de canción protesta Loita Amada, a Asociación Carqueixa de Souteliño vén de colocar o broche de ouro a esta novena edición coa confirmación dun concerto do grupo Luar na Lubre.

En Souteliño haberá zona de acampada, aparcadoiro e postos para cear. Dende a organización convidan a todos os que se acheguen a colaborar mercando unha camiseta, algo de beber ou comer, ou mesmo falando coas 30 residentes en Souteliño e que defenden un rural vivo.

Os concertos arrancarán ás 20,00 horas coa banda Nova Era. Posteriormente actuarán Breo ás 21,00 horas, Luar na Lubre ás 22,30 horas, seguidos por Gwendal, ás 00,30, e pecharán o festival Loita Amada, ás 02,00 horas.