Destinan 700.000 euros á nova gardería de Verín

O Concello de Verín vén de anunciar a creación dunha nova gardería pública para nenos e nenas de entre 0 e 3 anos, que ademais estará xestionada de forma directa polo propio municipio.

Este novo centro, que polo momento aínda non conta con emprazamento definitivo nin prazo de execución, sumarase á oferta pública dispoñible para as familias da vila verinesa, ampliando e mellorando os servizos esenciais.

Este proxecto será posible grazas a unha subvención de 710.821,10 euros concedida pola Consellería de Política Social e Xuventude da Xunta de Galicia a través dos fondos europeos Next Generation, para a creación de devandito centro.

O grupo de goberno municipal PSOE-BNG salientou a importancia deste investimento: “Un proxecto que responde a unha necesidade longamente reclamada pola nosa veciñanza. Con esta nova gardería, Verín dá un paso adiante en conciliación, educación e apoio ás familias, piares que consideramos fundamentais para o desenvolvemento da nosa comunidade”.

Mellora na conciliación

Dende o Concello sinalan que a nova gardería permitirá ás familias traballadoras “equilibrar as súas responsabilidade e facilitar a conciliación laboral e familiar”, ademais de xerar “emprego local”.