A III romaría Ponte Farruca volveu reivindicar o rural dende Laza

Malia a calor, a III edición da romaría Ponte Farruca foi “un éxito pola cantidade de xente que veu e a participación en tódalas actividades”, apuntan dende a organización. O evento contou ademais con influencers e diversos actores e actrices de Galicia.

O certo é que dende primeira hora da mañá non faltaron cousas que facer. Ademais da feira de artesanía e de material agrícola, tivo lugar a “tractorada engalanada”, un clásico do Farruca que triunfou unha vez máis. A cativada tamén tivo o seu momento co “Ponte Farruquiña”.

Tralo xantar, pola tarde volveron saír os tractores e a ruta de coches clásicos, pero ademais tiveron lugar algunhas das iniciativas máis comprometidas e interesantes, coma os “Farruca Dates”, a proxección de cinema rural, ou un obradoiro de baile.

Á noite foi o turno para a música, cunha foliada aberta que deu paso os concertos das Silveiras do Támega, Kuartetas, Bicoia, De Ninghures e o Mondra. Esta romaría popular tivo unha vez máis o fin de reivindicar a diversidade sexual e á muller no rural ourensán.