A Mancomunidade de Verín tamén se une para esixir a Renfe trens na Gudiña

A asemblea ordinaria da Mancomunidadeaprobou este martes unha moción demandando ao Goberno, a Adif e a Renfe a restitución das frecuencias de trens suprimidas a partir do 9 de xuño dende a estación do AVE da Gudiña.

Eva Pérez Gamote, alcaldesa de Vilardevós, amosou a súa adhesión ao texto, o mesmo que a Deputación aprobara por uninimidade o venres, agás polas referencias veladas ao alcalde de Vigo, Abel Caballero.

A mandataria expuxo que “estou a favor da moción, en beneficio do noso territorio e dos servizos para a xente, pero non me parece ben que se aproveite para sacar tallada política, isto é algo que nos atañe a todos”.

A raíz diso, os representantes das tres forzas representadas debatiron sobre a utilidade pública dos servizos ferroviarios, e acordaron seguir “traballando xuntos” para esixir a reposición dos trens, comezando pola xuntanza convocada este xoves na Gudiña.

Outros puntos da orde do día

A asamblea tamén aprobou a conta xeral do orzamento 2024 e ratificou a Diego Lourenzo como presidente da mesa local de coordinación interinstitucional fronte á violencia de xénero.