Mirito Mateo presenta cun concerto o seu novo libro

Ao igual que no resto de concellos polos que xa ten pasado, “Mirito” Mateo aproveitará o acto para ofrecer un concerto co seu acordeón, cunha selección de pezas actuais “pero tamén clásicas, e que tan pouco se relacionan co meu instrumento”.

O libro, que Mateo define como “un conto educativo”, está acompañado por ilustracións en acrílico da artista natural de Verín Olimpia Seoane. Se ben xa conta con varias novelas, o propio artista cre que “o conto é o xénero en que mellor me defendo”.

A historia deste novo libro trata sobre a castaña, “porque a súa historia descorre paralela á do home e á da vida humana, dende que é castaña ata que é castiñeiro, e volve ser castaña outra vez”. Malia a súa aparente profundidade, o conto “convida á reflexión sobre os ciclos de vida co protagonismo da árbore máis senlleira do mundo, cuxa alimentación é tamén vital para nós”.

O relato, en primeira persoa desde a perspectiva “dunha castaña que vai para castiñeiro”, tamén fala sobre “unha sociedade que xa non existe, en que todo o mundo se axudaba, as portas non tiñan pechadura e podías xantar e merendar en calquera casa. Entón chegaron os incendios, e a castaña abafa por esa modernidade non benvida”. n