Monterrei leva a Festur a Xuntanza Internacional de Gaiteiros

Este ano tomaron parte nos catro días de feira máis de 50 festas recoñecidas como de interese turístico e cultural. Unha delas foi a Xuntanza Internacional de Gaiteiros, que a Real Banda de Gaitas da Deputación de Ourense organiza dende hai trinta e nove anos. A XXXIX edición celebrarase este vindeiro agosto, o venres 30 en Flariz e o sábado 31 no Castelo de Monterrei.

Ademais de presentar a Xuntanza, o concello de Monterrei amosou en Festur a súa oferta turística. Foron numerosos os visitantes que se achegaron a coñecer Monterrei ao pavillón 2, no espazo de Turexpo Galicia, así como profesionais interesados en promocionar e dar a coñecer Monterrei entre os seus clientes. Entre outras actividades, o xoves 30 de maio fíxose unha degustación de viños da Denominación de Orixe (D.O.) Monterrei.

José Luis Suárez, alcalde do Concello, considera que a Xuntanza Internacional é “un evento moi importante a nivel comarcal e provincial, e estamos agradecidos á Deputación por converter Monterrei en sede permanente dende o 2007”.

Respecto da presenza da vila en Festur, o mandatario recalca que “levamos varios anos participando, e permítenos darlle tamén difusión aos nosos viños”.