Un obradoiro preservará e elaborará capuchóns do entroido verinés

A profesional do audiovisual Sabela Souto (@_sabelasouto) e a costureira Carme Gómez (@Carmecas) impulsan o Obradoiro do Capuchón, unha nova iniciativa coa que buscan preservar e pór en valor esta prenda típica do entroido verinés para que non desapareza, ao tempo que os participantes aprenden a elaborar o seu propio capuchón.

A diferencia do cigarrón, o capuchón é un disfraz “de rúa”, tal e como o define Souto, “que ten todo o mundo na casa e que tradicionalmente se fixo a base de retallos”. Consiste nunha capa “de corpo enteiro”, con dous petos que sirven para “gardar fariña”. Igual de importante é o anteface ou máscara, e que permite manter o anonimato vestindo o capuchón.

O obxectivo do obradoiro é crear un capuchón de comezo a fin ao longo de catro sesións, os días 25 e 26 de xaneiro, e 1 e 2 de febreiro, todos de 16,30 a 19,30 horas. Non é necesario ter experiencia previa, nin sequera saber coser.

20 prazas antes do 16 de xaneiro

En total hai 20 prazas, con un custo de 40 euros, teas aparte, e cómpre inscribirse antes do 16 de xaneiro, en Bazar Souto ou chamando ao 618 737 166. O Concello colabora cedendo o espazo no que se fará, na Casa da Xuventude.