O Pleno de Verín aprobou a conta xeral do ano 2022

O Concello de Verín celebrou onte un pleno extraordinario urxente no que se aprobou a liquidación orzamentaria da conta xeral de 2022, entre outros trámites.

O grupo de goberno PSdeG-PSOE e BNG e a oposición do PP chocaron dende o primeiro momento, xa que os catro edís populares votaron en contra da urxencia da convocatoria.

A voceira popular, Lara da Silva, argumentou que as convocatorias realizábanse “a salto de mata”, dificultando o seu labor “fiscalizador”, ao non ter tempo “para revisar a documentación”.

O alcalde, o socialista Gerardo Seoane, afirmou que a premura debíase a “unhas subvencións de 600.000 euros que tentaremos acadar, e precisamos que as contas estean subidas”.

Así, cos votos favorables de PSOE e BNG e os votos en contra do PP, aprobouse iniciar a tramitación administrativa da conta xeral do ano 2022, e deuse conta da aprobación por decreto da alcaldía da liquidación do orzamento xeral do ano 2023.

Operación de tesourería e modificacións de créditos

Coa mesma aritmética aprobouse unha operación de tesourería a curto prazo por importe de 2.600.000 euros. Da Silva acusou ao Concello de realizar “préstamos” deste xeito “reiteradamente”.

Seoane replicou a Da Silva que este tipo de operacións “pídense e cancélanse tódolos anos”, co fin de “solventar defectos de financiamento en meses determinados e adiantar o financiamento das subvencións que nos conceden”.

Por último, a sesión plenaria aprobou un expediente de modificación de créditos extraordinarios destinado á adquisición de terreos para patrimonio municipal, pavimentacións e reparación de vías públicas, e publicidade e actividades culturais.