O Ponte Farruca de Laza volve cun crowdfunding

Esta iniciativa cultural combina concertos, teatro, talleres, baile e cinema, co fin de amosar todo o potencial do rural ourensán. O cabeza de cartel musical é Modra, moi achegado a Laza e á súa tradidición entroideira.

Outras confirmacións son os artistas De ninghures, Monoulious DOP e máis DJ Celulite para o peche da festa. A música tradicional tampouco faltará, e estará representada por grupos lazaos como As silveiras do Támega e Kuartetas.

Pero non só de música vive esta romaría. Durante todo o día volverá haber unha feira de artesanía e agrícola, ademais dunha mostra de coches clásicos. Non pode faltar tampouco o xa clásico percorrido polas rúas de Laza nunha tractorada engalanada, así como un obradoiro de baile e o cinema rural.

Outro dos eventos importantes será o Ponte Farruquiña, unha actividade teatralizada para nenos e familias, centrada na coeducación e na igualdade de xénero. E ata a súa propia versión das citas rápidas co Farruca Dates.

Micromecenado

Outra das principais novidades é o lanzamento dun “crowdfunding”. Con este micromecenado ou financiación colectiva, calquera persoa poderá facer unha achega económica, desgravable na Renda, para colaborar coa celebración deste festival sen ánimo de lucro.

As aportacións, que parten dos 10 euros, van todas acompañadas de distintos agasallos, coma chapas, pulseiras ou bolsas de tela. Dependendo da cantidade que se done ao Ponte Farruca, unha das recompensas é ir montado en tractor durante a tractorada.