Sandín acolle este sábado a máis de 300 mulleres rurais

A organización deste día, cunha serie de actos e actividades que encherán esta aldea con máis de 300 mulleres rurais de toda a provincia, corre a cargo da asociación de mulleres rurais local, “Fonte do Ouro”.

Fundada en 2017 pola súa presidenta, Sinda Rivero, conta na actualidade con 46 socias deste núcleo, pero tamén dalgúns limítrofes coma A Madanela, Flariz ou incluso da veciña Cualedro.

Dende Fonte do Ouro teñen actividades “todo o ano”, apunta a súa presidenta, con cursos “de todo tipo: ximnasia de mantemento, pilates, informática, obradoiros de costura, floristería… case tódolos días da semana”. Alén disto, a asociación tamén ten rehabilitado nestes anos outros equipamentos de Sandín, como o forno ou a fonte.

A Federación provincial de Mulleres Rurais (Femuro), con sede en Verín, celebra tódolos anos esta data nalgún dos pobos de Ourense cunha asociación de mulleres rurais.

Xa estaba previsto que Sandín fora a anfriona con anterioridade, pero coa pandemia e a celebración dos 25 anos de Femuro o ano pasado, non será ata mañá cando por fin aconteza.

Pandeiretada e documental

A xornada arrancará coa benvida da presidenta, unha visita guiada polo pobo e a recepción de autoridades. Ás 13,30 horas terá lugar unha pandeiretada rural feminista dos grupos das asociacións, seguida polo xantar, onde se proxectará o documental que vén elaborando Fonte do Ouro sobre Sandín e a asociación.