Vilardevós conmemora o 50º aniversario do seu colexio

O Concello de Vilardevós conmemorará o vindeiro sábado, 31 de agosto, medio século dende que entrara en funcionamento o Colexio de Educación Infantil e Primaria (CEIP) Plurilingüe Rodolfo Núñez Rodríguez, dedicado a este veciño ilustre que donou a finca onde se sitúa o centro educativo.

Con fin de celebrar esta efeméride, as portas do recinto escolar abrirán ás 12,00 horas e albergarán unha feira de produtos locais do concello. Ademais haberá inchables e xogos para a cativada grazas á ludoteca móbil da Deputación de Ourense.

As pandeireteiras da asociación Entre Nós e da escola de música de Vilardevós porán a amenización musical. A entrada tanto para a feira como ás actividades para os máis pequenos é de balde.

Posteriormente celebrarase un xantar popular ás 14,00 horas. Os tickets están á venda ata mañá ás 14,00 horas nos bares e na casa consistorial de Vilardevós.

Inauguración da rúa Rodolfo e Patricia Núñez de las Cuevas

Pero a mañá arrancará con outro momento importante, antes do inicio da conmemoración do 50º aniversario do CEIP. Ás 11,30 horas, na Casa Agraria, terá lugar a inauguración da rúa Rodolfo e Patricia Núñez de las Cuevas, nome que substituirá á actual Estrada de Riós.

No acto, que contará coa presenza dos representantes institucionais do Concello, revelarase a placa coa nova nomenclatura da rúa, coa presenza de familiares dos homenaxeados.

O Concello honrará así a memoria do xeógrafo natural de Vilardevós, finado o pasado 14 de maio, e máis da súa esposa. Núñez de las Cuevas, considerado o pai da xeografía española moderna, foi ademais fillo de Rodolfo Núñez Rodríguez. Ademais de enxeñeiro xeéografo, tamén foi militar. Como director xeral do Instituto Geógrafico Nacional (IGN), modernizou a institución.