A Xunta distribúe palla e cereais para a fauna silvestre tralos lumes

Os concellos de Cualedro, Laza, Maceda, Monterrei e Oímbra, afectados todos eles pola vaga de incendios forestais de agosto, xa recibiron preto de 5.000 quilos de palla e máis de 300 quilos de cereais repartidos pola Xunta, dirixidos a alimentación da fauna silvestre tralos lumes.

O obxectivo fundamental é garantir unha fonte alimenticia de cara ao outono para as poboacións de herbívoros (principalmente grandes ungulados) e aves, se ben existen outras especies como as lebres que tamén as aproveitan. Esta distribución de alimento vense realizando naquelas áreas nas que os animais puideron resgardarse ao conservar vexetación.

A previsión inicial da Consellería de Medio Ambiente e Cambio Climático é distribuír un total de 31.000 quilogramos de palla e 3.000 quilogramos de cereais, pero a intención é ampliar esas cantidades naqueles puntos onde sexa necesario reforzar os aportes alimentarios.

Reparto aéreo

Dado que moitas das illas de vexetación son de difícil acceso por terra, parte do reparto de alimento farase con medios aéreos. Deste modo, está previsto que a vindeira semana comece o transporte en helicóptero e a súa distribución dende o aire (de xeito similar ás operacións de “helimulching” dirixidas á consolidación de solos).