A mocidade de Cualedro e Monterrei colabora no futuro dos seus montes

RECUPERACIÓN DO TERRITORIO

42 escolares de Cualedro e de Monterrei uniron este luns as súas forzas para evitas as escorrentías de cinsa e colocar bebedeiros e comedeiros para a fauna afectada polos lumes, tomando conciencia do medio rural no que viven

Profesores, profesionais do monte, cargos e rapaces traballaron onte en equipo contra as escorrentías. | C.L.M.

Hai apenas un mes, a comarca enteira ardía mentres o alumnado desfrutaba das súas merecidas vacacións de verán. Trala volta ao colexio, tanto pais e nais como o seu profesorado traballan arreo para que a cativada comprenda o cambio que sufriu de súpeto a paisaxe que os rodea.

Alén de concienciar, é vital implicar á rapazada na recuperación do territorio queimado pola vaga de lumes, facéndoos partícipes dos esforzos actuais dentro dun longo camiño ata que reverdeza o rural que eles mesmos herdarán nun futuro.

Con ese fin, alumnado de 3 a 12 anos de Cualedro e Medeiros participou este luns nunha actividade de recuperación e prevención organizada polo CDR Portas Abertas e a comunidade de montes de Cualedro, coa colaboración do Concello, no marco dos proxectos “Voluntariado ambiental” e “Implícante na túa comunidade” da Consellería de Cultura, Lingua e Xuventude.

Cativos e maiores non escatimaron en esforzos para axudar no monte. | C.L.M.

O momento máis salientable tivo lugar no monte ardido ao carón do estadio de fútbol e dos depósitos de auga cualedreses. Alí os escolares espallaron polo terreo calcinado varias pacas de herba seca, de modo que a chuvia non provoque escorrentías que depositen a cinsa nos ríos e regatos que subministran de auga a veciños e animais.

Coa axuda de profesores, representantes e axentes ambientais, os 42 estudantes tinguiron a ladeira da cor dourada da palla, e crearon con botellas de plástico reutilizadas bebedeiros e comedeiros que axuden á fauna da contorna.

Charla previa

A charla do bombeiro forestal Carlos Palomanes espertou a curiosidade dos nenos. | C.L.M.

Previamente, os cativos recibiran unha charla no CEIP Vicente Risco de Cualedro, á que asistiron docentes, o director territorial de Medio Rural, José Antonio Armada, o alcalde, Luciano Rivero, deputados autonómicos e persoal da Xunta.

Laura Garrido, de Portas Abertas, preguntou aos pequenos sobre os efectos e as razóns detrás dos lumes, e estes amosaron ter a lección aprendida: “A calor e a xente”. A continuación, o bombeiro forestal da BRIF Laza, Carlos Palomanes, falou sobre o seu labor e amosou o seu equipo técnico, como un batelumes que todos recoñeceron.