Anxo Carracedo: ’Non todo son xenes, somos a mestura de xenética e ambiente’

O ’señor de Santa Comba que ten un gran grupo’, como así lle gusta autodefinirse ó director do Instituto de Medicina Legal da Universidade de Santiago de Compostela, Anxo Carracedo, acercou onte, de forma sinxela e amena, as claves do ADN e, sobre todo, o seu presente e futuro. Da actualidade, Carracedo salientou o que xa empeza a ser unha realidade: a Medicina á carta; sobre todo no que atinxe os tratamentos de cancro. Un campo no que hai que profundizar dado que ’se foramos quen de analizar o xenoma e saber se un paciente vai responder mal a un determinado fármaco, avanzaríase moito’. Os datos avalan esta necesidade: a reacción adversa a fármacos sitúase entre a cuarta e a sexta causa de morte nos países desenvolvidos.

Sen embargo, o reto do futuro neste ámbito é, segundo Carracedo, ’as análises do compoñente xenético das enfermidades máis comúns, como a diabetes, a artrite ou o cancro’. Deste xeito, ’se puideramos saber os compoñentes xenéticos das enfermidades, poderiamos tratalas mellor’, explicou.

Aínda así, Carracedo quixo deixar claro que ’as enfermidades xenéticas nunca se van poder evitar de forma completa, porque ás veces non son herdadas’. O motivo? ’Non todo está nos xenes. Na intelixencia, na criminalidade... os factores culturais seguramente teñen máis importancia que os xenes. Somos sempre unha mestura de xenética e ambiente e as características físicas hérdanse máis que as conductas’. Eso si, ’ata nas enfermidades ambientais máis puras é importante coñecer o xenoma desde individuo’, sobre todo á hora de prantexar o tratamento e os seus posibles resultados.

Así as cousas, o ADN supuxo unha auténtica revolución en moitos ámbitos e prantexa tamén problemas éticos, ’como pasa en todas as ramas da medicina’, matizou Carracedo.