As “faíscas” do OUFF xa están listas para prender

O OUFF pon en marcha a primeira edición da residencia audiovisual Faíscas. Tres equipos conformados por rapaces que están a iniciarse no mundo audiovisual traballarán na realización dunha curtametraxe ao longo da semana, que se exhibirán o sábado no mesmo lugar. O Centro Cultural Marcos Valcárcel acolleu onte o encontro entre Óscar Doviso, director artístico do festival, e os participantes. Deste xeito, Doviso foi o encargado de darlles a benvida, desexando que pasen “unha semana intensa e produtiva” ás que denominou “as primeiras faíscas do OUFF”.

As propostas que se desenvolverán son diversas e singulares. “Rúa Nosa”, presentada por Andrea Varela, é unha curta protagonizada por tres mulleres que intentan renomear as rúas de Ourense con nomes de mulleres esquecidas.

“Lúa de sangue”, defendida por Pablo Galdeano, relata a historia de dúas persoas, entre as que destaca unha meiga que vive infiltrada na sociedade actual. Por último, “Anoitecer” é un falso documental arredor dun músico marcado polo fracaso, segundo explicou o portavoz do seu equipo, Rodrigo Chapela.

O coordinador da actividade, Tomás Lijó, subliñou que esta proposta será positiva para os participantes con independencia dos resultados acadados. “Ás veces apréndese do exemplo e ás veces do escarmento, pero seguro que a cousa sae ben”.

Esta actividade inclúe un premio económico para os gañadores: a curta gañadora recibirá 600 euros, mentres que a segunda clasificada obterá 300.