Chapa e pintura para o inicio do Campamento Urbano

OURENSE CHEO DE COR

A Asociación Xuvenil Amencer ultima os últimos detalles antes de dar comezo as actividades lúdicas que organizarán entre o 1 e o 13 de agosto, nas que esperan reunir máis de 700 rapaces.

Grupo de monitores que se encargaron de pintar el muro.

Como marca a tradición, o muro de Salesianos renovou a súa imaxe de cara ao Campamento Urbano de Amencer, que dará comezo este vindeiro venres, 1 de agosto. Membros da Asociación Xuvenil pasaron a mañá na rúa Saenz Diez entre pinceis e pinturas para facerlle un lavado de cara aos debuxos que ano tras ano se inclúen nese inmenso mural que caracteriza ao centro. Alí, tamén actualizaron a información de horarios e inscricións.

“Xa temos case 700 rapaces anotados, pero contamos que se sumen máis, poden facelo ata o propio día de inicio”, explica Javier Carballo, un dos monitores. Desde as 10,00 horas do venres, a secretaría estará aberta para a inscrición dos participantes. Ese primeiro día terá lugar o xesto creativo nas pontes da cidade como xa é habitual no inicio do campamento. Dende entón ata o día 13 están previstas unha morea de actividades para que os rapaces poidan desfrutar.

Javier Carballo actualizando as datas do Campamento Urbano.

Como novidade, este ano o Día da Natureza pasa a ser o Día da Provincia. “Faranse xogos en distintas localidades aos que se van poder unir tamén os nenos desas vilas”, explica o monitor, que celebra que no campamento participen rapaces de distintos puntos xeográficos e resalta que “ademais de pasalo ben, tamén aprenden sen darse conta”.