A Deputación celebrou un pleno con protagonistas e propostas moi diferentes

Preto de medio cento de nenos do campamento urbano de Amencer visitaron onte a Deputación de Ourense, con motivo do “Día do Parlamento”. Alí levaron a cabo un pleno infantil no que se someteron a debate unha serie de propostas para a realización de novas actividades na próxima edición do campamento.

O deputado de Representación Institucional da Deputación de Ourense, Rosendo Fernández, foi o encargado de recibilos e acompañalos durante a actividade. Fernández, que respondeu as preguntas formuladas polos rapaces e rapazas, explicou o funcionamento e competencias da institución provincial, sinalando que “cando un veciño ten un problema acode ao seu alcalde, e cando un alcalde ten unha necesidade acode á Deputación, que é o concello dos concellos, cooperando na prestación de múltiples servizos”, entre os que citou como exemplos a recollida de lixo ou a xestión do ciclo da auga.

Ao remate da actividade, os participantes recibiron agasallos institucionais da Deputación, mentres que Rosendo Fernández recolleu en nome da institución un diploma conmemorativo.