A Deputación lanza un plan de “reto dixital” para 6.000 veciños

A iniciativa, que arranca en novembro e á que xa se sumaron 67 concellos, centrarase en maiores, mulleres, mocidade e desempregados con cursos gratuítos de 7,5 horas. O proxecto, financiado con fondos europeos Next Generation, presentarase oficialmente o 6 de novembro.

O obxectivo é formar a 6.000 persoas do ámbito rural da provincia, poñendo o foco nos colectivos máis vulnerables a esta nova forma de illamento. O programa oriéntase fundamentalmente a persoas maiores, mulleres, mocidade e persoas desempregadas.

Os cursos, que serán totalmente gratuítos para o alumnado, terán unha duración de 7,5 horas e impartiranse tanto en liña como de forma presencial. O temario centrarase en aprender a operar “con confianza e seguridade” para comunicarse, informarse, realizar transaccións e, sobre todo, interactuar coas Administracións Públicas.

A institución provincial asegura que segue en contacto cos 25 concellos que aínda non se integraron, co obxectivo de incorporalos “de forma inminente” para lograr unha implantación total.