Esgos e Nogueira poderán optar ó bus metropolitano

O Comité político-técnico para desbloquear a situación do transporte metropolitano en Ourense, activado pola Deputación, convidou onte aos Concellos de Esgos e Nogueira de Ramuín a incorporarse a dito organismo “pola súa proximidade aos polígonos industriais”. Na primeira reunión desta comisión estiveron representados a Deputación, os grupos políticos da mesma (PP, PSOE, BNG e DO), a Xunta e os concellos de Amoeiro, Barbadás, Cenlle, Coles, Ourense, Paderne de Allariz, Pereiro de Aguiar, Taboadela, A Peroxa, Punxín, San Cibrao das Viñas, Toén e Vilamarín.

Na reunión acordouse amosar o compromiso do Comité de sacar adiante solucións que permitan dotar á area metropolitana de Ourense “dunha rede de transporte colectivo de viaxeiros, en autobús, que sexa rápido e atractivo para a veciñanza”. Tamén acordaron que os concellos limítrofes coa cidade presenten antes do 1 de setembro as súas propostas de extensión de liñas, cunha limitación xeral de 3 quilómetros de extensión con respecto ás liñas actuais. A comisión adoptou que os concellos non limítrofes co termo municipal de Ourense presenten antes do 1 de setembro as súas necesidades e propostas de carácter complementario ás anteriores, así como que se se realicen reunións entre o persoal técnico designado polas AAPP que teñen contratos en vigor ou próximos á súa licitación que poden resultar afectados.