A falta de estratexias comúns, un atranco para o enoturismo

Un equipo multidisciplinar formado por persoal docente da Facultade de Ciencias Empresariais e Turismo e da Escola Superior de Enxeñaría Informática do Campus de Ourense vén de desenvolver un proxecto de investigación centrado na reputación dixital do enoturismo ourensán. Este estudo é beneficiario da convocatoria de axudas INOU 2020, financiada pola UVigo e a Deputación, cando a provincia é sede de catro das cinco denominacións de orixe galegas.

Os datos de opinión sobre as adegas da provincia de Ourense obtivéronse da plataforma Google Maps mediante a aplicación da tecnoloxía de web scraping, analizando 1506 valoracións deixadas por usuarios de 92 adegas da provincia. A partir desta información, o equipo da UVigo realizou unha matriz DAFO onde se diagnosticou a situación do enoturismo na provincia a través das súas debilidades, ameazas, fortalezas e oportunidades. No que respecta ás principais debilidades, o estudo apunta á falta de cooperación entre os sectores público e privado.

Así, segundo indica o equipo que realizou o proxecto, "non existe unha estratexia común de promoción e difusión do sector en Ourense, a profesionalización é aínda baixa e a visión de negocio é moi a curto prazo".

No que respecta á reputación en Internet, subliñan que "hai un uso deficitario das redes sociais e outras novas tecnoloxías como canles de difusión e creación de reputación online, subindo contidos de modo esporádico. Aínda así, as valoracións recibidas son positivas", conclúen.