Fina Calleja: “Os artistas merecen ter espazos dignos, levamos 4 anos sen o auditorio”

O Festival Internacional de Teatro de Ourense (FITO) alcanza o seu ecuador nunha edición número 16 que fai unha aposta como nunca antes polos grupos emerxentes. O FITO acolle 16 propostas escénicas en ubicacións como o Teatro Principal, o Liceo, a Casa de Cultura Manuel María de Barbadás e diversas prazas da cidade. A actriz ourensá Fina Calleja, da compañía Sarabela Teatro, dirixe o festival. Precisamente hoxe ás 20,30 horas, en Barbadás, exhíbese unha das actividades paralelas do FITO: o certame 67 graos, que recoñece cinco propostas creativas para subvencionalas con 300 euros de axuda. Os gañadores son Susana Lourenzo, con “Obervarte”; Laura Alvarellos, con “Promesas”; Mikel Aristegui, con “Ouveo”; Ana Abad con “As mulleres que bailan na néboa” e Cristina Collazo con “Frida”. Os artistas ensinarán hoxe os seus traballos e optarán tamén ao premio do público, dotado con 600 euros. A entrada á Casa da Cultura de Barbadás é de balde.

Xa no ecuador do festival, este martes preséntase como un día importante polas bolsas de creación artística, unha das actividades paralelas que impulsan.

É a terceira edición das bolsas. O xurado escolleu os proxectos e xa teñen 300 euros para axudar á creación. Houbo moito interés, está pensado para novos creadores pero tamén se presentou xente coñecida.

O festival aposta especialmente este ano polos grupos emerxentes. Por que?

Decidimos combinar os grupos menos coñecidos en Ourense con outros consolidados. O sábado teremos a unha artista performática de Medellín en primicia.

Deciden tamén recuperar as prazas como centro de exhibición, aínda que a falta de colaboración municipal está detrás disto. Fixeron da falta da colaboración unha oportunidade?

O festival é un escaparate para presentar o que está fóra das programacións habituais de teatro e en Ourense con máis necesidade, posto que o espacio do Auditorio non programa. É unha situación que non só coloca ao festival nunha posición complicada, porque os artistas merecen poder exhibir en espacios dignos. Entón, tiñamos a intención de recuperar a rúa, pero realmente xúntanse a fame coas ganas de comer. Hai espectáculos que piden un escenario no Auditorio, pero levamos xa catro anos sen poder contar con ese espazo. O tremendo é que lle acontece a tódalas citas culturais que deixaron de programar no Auditorio.

Teñen unha tarefa complicada…

Temos a fortuna enorme que é o pulo que nos dan os espectadores. Imos atopando aliados como o Liceo e o Concello de Barbadás, pero non son condicións.

O festival amplíase fóra da cidade, pero ir a Barbadás tamén será por necesidade.

É a segunda vez que imos. Xurde desa vontade de expandir o festival a outras localidadas da provincia, pero tamén vén de impedir ese acceso na cidade.

Fóra si lle teñen cariño ao festival, non?

Si. É alucinante que no programa de 67 graos recibamos propostas de autores de toda Galicia, que nos preguntan, nos comentan… E que as compañías elixan o FITO para estrear fala moito da importancia estratéxica do festival nas artes escénicas de Galicia.