A investigación alimentaria une a UVigo con San Tomé e Príncipe

Un equipo da Facultade de Ciencias do Campus de Ourense participa nun proxecto europeo que creará en San Tomé e Príncipe un laboratorio de tecnoloxía alimentaria. O programa capacitará os alumnos e profesores universitarios do país no eido dos alimentos.

O proxecto ten unha duración de tres anos, ata finais de 2026, e conta cun orzamento de preto de 447.528 euros. Está financiado con fondos europeos e participan a UVigo, a Universidade de San Tomé e Príncipe, o Instituto Universitário de Contabilidade, Administração e Informática deste mesmo país e a Universidade do Porto (Portugal), que coordina o proxecto.

Por parte da UVigo, participa persoal docente e investigador como a profesora Sidonia Martínez, da Área de Tecnoloxía dos Alimentos; o catedrático Gil Garrote, de Enxeñería Química; a profesora Raquel Rial, de Nutrición e Bromatoloxía, e a catedrática Elena Martínez, que coordina a participación galega.

Participarán, principalmente, na formación do alumnado universitario de San Tomé e Príncipe nos módulos de tecnoloxía alimentaria e procesado dos alimentos. Tamén no deseño de devandito laboratorio, no estudo de alimentos seleccionados e no desenvolvemento dos novos produtos que se elaborarán a partir deles, como marmeladas, aperitivos e zumes, por citar algúns exemplos.