Natalia González leva ao xulgado a Jácome por negarlle a palabra

A edil e portavoz do grupo municipal socialista, Natalia González Benéitez, interpuxo un recurso no xulgado co obxectivo de que se protexan os dereitos fundamentais á participación política fronte ás actuacións do alcalde, Gonzalo Pérez Jácome. González denuncia que o alcalde denegoulles en “reiteradas ocasións” a palabra aos concelleiros e concelleiras, e mesmo ao persoal da Administración local durante a celebración das sesións plenarias.

Nesta liña, o grupo municipal socialista tamén anunciou que presentará unha iniciativa, que espera consensuar co resto de forzas políticas con representación na Casa Consistorial, para que non teñan cabida máis vulneracións dos dereitos fundamentais dos e das edis e que poidan exercer, adecuadamente, o seu labor de fiscalización do Goberno que encabeza Gonzalo Pérez Jácome.