O OUFF postúlase como un evento dinamizador

Achégase o momento de que Ourense se converta no epicentro do audiovisual, algo que se leva repetindo dende hai xa 30 anos. Entre o vindeiro 26 de setembro e o 5 de outubro, o Ourense Film Festival (OUFF) traerá tanto á cidade como a distintos puntos da provincia diversas actividades que permitirán reducir o “deserto cultural” existente.

Nun acto celebrado onte no Balneario de Laias, o director do festival, Óscar Doviso, presentou de xeito oficial unha edición coa que asegurou “estar moi ilusionado”. Xunto a el estiveron o director xeral de Cultura da Xunta de Galicia, Anxo M. Lorenzo; o director da Axencia de Turismo de Galicia, Xosé Manuel Merelles; e o presidente da Deputación de Ourense, Luis Menor.

Todos os presentes coincidiron en salientar a relevancia do OUFF como referente cultural e escaparate internacional do cinema. “Significa moito máis que unha semana de cine”, apuntou Menor, que convidou a “aqueles que critican a inversión en cultura” a comprobar que “esa inversión recupérase e multiplícase por moitísimo”.

En palabras do director xeral de Cultura, “o OUFF é o festival audiovisual de referencia en Galicia” e como tal hai que poñelo en valor como un eixo estratéxico. Así, o director de Turismo de Galicia incidiu en que este tipo de eventos tamén actúan como tractores de turismo e destacou a súa achega á desestacionalización da oferta.

Nesta liña, o director do festival subliñou que moita xente viaxará este ano por primeira vez a Ourense, “para coñecer non só o festival, tamén a propia provincia e facer turismo”.

No transcurso do seu discurso, Doviso presentou o libro conmemorativo da 30ª edición, unha obra da xornalista Sonia Torre Delgado que recolle, cunha mirada panorámica e emotiva, algúns dos momentos máis significativos vividos ao longo destas tres décadas.

En canto á programación, ao longo dos dez días que dura o festival, poderase desfrutar de máis de 70 proxectos, entre os que haberá tanto produccións internacionais da talla de “Un simple accidente” -gañadora da Palma de Ouro en Cannes 2025-, como filmes con selo ourensán, ademais dalgunhas estreas como a de “Mi ilustrísimo amigo”, un traballo da directora galega Paula Cons.

Daniel Guzmán recibirá a nova Calpurnia de Honra

O actor, guionista e director Daniel Guzmán foi o elixido polo xurado do Ourense Film Festival (OUFF) para recibir a Calpurnia de Honra nesta 30ª edición. A súa vinculación co festival é estreita: “foi xurado, estivo en varias edicións e incluso presentou aquí en 2003 a súa curta Sueños, coa que gañou un Goya”, destacou o presidente da Deputación de Ourense, Luis Menor. O equipo do festival decidiu recoñecelo como unha gran referencia do cine social. Guzmán recibirá nos próximos días un galardón redeseñado polo escultor Manuel Buciños, que neste aniversario transforma a clásica figura da Calpurnia nun rosto inspirado nas actrices do cine clásico.

Por outra banda, o director do OUFF, Óscar Doviso, anunciou os 17 membros do xurado das diferentes seccións oficiais: Internacional, Panorama Galicia, Curtametraxes, AISGE e CIMA. “Xuntamos profesionais de distintos eidos do audiovisual para conformar un xurado á altura desta edición. Estou seguro do seu compromiso co festival e de que as súas decisións serán acertadas, algo que coñeceremos na gala de clausura”, explicou.

Entre os nomes destacados figuran Sol Carnicero, pioneira da produción do cine español; Sylvie Imbert, recoñecida maquilladora con case cen producións, tres Premios Goya e membro das academias de cine de España e Hollywood; María Costas, actriz con sólida traxectoria no teatro, música e audiovisual; e Isabel Blanco, intérprete galega coñecida por Mareas Vivas e Un franco, 14 pesetas.