Pato e Cedrón están Soas no Teatro Principal

Unha inquedanza que a gaiteira e pianista ourensá Cristina Pato poderá desbotar mañá mesmo ás 20.30 horas. Nese momento, o telón abrirase para que ela e a cantante Rosa Cedrón poidan interpretar unha serie de cancións coñecidas por tódolos galegos e que 'poden tocar a fibra das diferentes xeracións'. En especial, soarán os temas incluídos no disco 'Muller', gravado co obxectivo de 'recrear o ambiente dun salón da casa e facer que o público se sinta preto de nós', explica Pato, mesma atmosfera que constrúen nos concertos.

O proxecto Soas naceu hai case catro anos 'de casualidade' e mentres as dúas artistas agardaban o seu turno para participar como convidadas nun concerto. Conta Cristina Pato que naquel momento 'vimos que había unha conexión porque as dúas viñamos do mundo clásico e tiñamos pasado pola música de raíz'. Foi unha tarde de improvisación na casa materna da ourensá a que deu orixe a esta andaina compartida.

Cristina Pato e Rosa Cedrón, elas 'soas' son quen de amosar a relación 'extremadamente bonita' que manteñen. Do mesmo xeito, a ourensá pode dar a coñece 'a esa outra Cristina', a pianista, que a ten levado a percorrer o mundo. Di que ó principio dos concertos que comparte con Cedrón, o público si que agarda a súa faceta de gaiteira, pero 'ós pouco tempo danse conta de que nin eu vou sacar a gaita nin Rosa vai cantar 'Tu gitana' e xa ven o concerto con emoción e cariño'. Con eses mesmos sentimentos está pensado porque, aínda que as dúas artistas son 'bastante libres e independentes' manteñen unha 'conexión tan forte que cando nos xuntamos', o resultado é o que mañá soará no Teatro Principal.