O PSOE advirte da “privatización” na cidade de Ourense do servizo de licenzas

O grupo socialista no Concello de Ourense advertiu onte que a intención do goberno local de “axilizar” as licenzas urbanísticas a través das ECCOM (compañías cuns requisitos ás que se lles permite facer de ponte entre a Administración e os cidadáns para outorgar licenzas) supón unha “privatización” das mesas e unha “maior inseguridade xurídica” para o Concello.

“Estas entidades son na actualidade obxecto de escrupulosas análises porque un informe externo, que é o que fan ditas empresas, nunca pode substituír a un informe interno da Administración, xa que é esta última a que rematará concedendo a licenza e polo tanto a que será a responsable ante terceiros”, puntualizou a edil María Fernández

Se ben é certo que as licenzas non se están a outorgar coa premura desexable, os edís socialistas cren que a solución radica en “dotar de máis recursos e persoal á Concellería de Urbanismo e actualizar a ordenanza municipal vixente, que é do ano 2013”. “Aínda que os que avogan por esta metodoloxía digan que as empresas están cubertas por un seguro de responsabilidade civil, unha vez que o Concello emite unha licenza o particular podería reclamarlle directamente á Administración local”, resumiu a edil descartando como adecuadas, dende todas as perspectivas posibles, as instrucións publicadas polo Concello.