O soterramento de Concepción Arenal carece de informes favorables, advirte o BNG

O BNG pide a retirada da exposición pública do anteproxecto de peonalización da Praza Concepción Arenal, publicado o pasado 9 de xullo, ata ter os informes preceptivos favorables.

Os nacionalistas sinalan que no mesmo expediente consta que existen informes desfavorables do servizo de augas e do servizo eléctrico, que poñen en evidencia deficiencias que non foron arranxadas neste novo anteproxecto presentado. Dende a formación nacionalista, entenden como esencial que o expediente estea correctamente conformado cos perceptivos informes favorables antes da súa exposición pública, tamén resaltan a ausencia de informes da Confederación Hidrográfica, da Policía Local e dos bombeiros, informes que o Bloque Nacionalista Galego considera necesarios por como se deseña o proxecto. Sinalan ademais que no propio expediente consta que un informe desfavorable da Hidrográfica pode acabar con este proxecto.

Luís Seara relata tamén que “é un despropósito que na futura concesión da auga haxa apenas investimento para obra nova de saneamento e abastecemento tendo en conta todas as necesidades que hoxe existen neses dous ámbitos, e que pola contra un terzo da concesión sexa para unha obra civil da construción dun aparcadoiro soterrado que non ten absolutamente nada que ver”. O portavoz nacionalista insiste en que “isto denota o escaso interese que o Concello ten en cuestións de infraestrutura básica, a pesar de ser unha obriga”. Así, dende o BNG agardan que as súas alegacións sexan estimadas, dadas as incongruencias e a importancia do proxecto.