Unha exposición reúne os fitos de autores ourensáns

O Centro Cultural Marcos Valcárcel acolle dende onte unha nova exposición que forma parte das actividades conmemorativas polo 75 aniversario da Editorial Galaxia. “Galaxia–Auria. 75 anos despois (1950–2025)” propón un percorrido pola vinculación histórica entre a editorial e a provincia de Ourense, que xogou un papel fundamental no desenvolvemento da cultura galega contemporánea. Houbo presenza ourensá no primeiro consello de administración, na dirección de proxectos, ou na creación de institucións culturais como a Fundación Otero Pedrayo.

Así, a través de catorce capítulos temáticos, preséntanse nomes, lugares e publicacións que testemuñan esta relación singular, desde figuras como Ramón Otero Pedrayo, Blanco Amor, Carlos Casares ou Chus Pato, ata voces actuais como Cristina Pato, Arancha Nogueira ou Alba Garrido.

A mostra poderá visitarse do 29 de xullo ao 24 de agosto de 2025, todos os días da semana, incluídos os festivos, en horario de 11:00 a 14:00 horas. A entrada é de balde.