Unha homenaxe ás raíces

40 EDICIÓN

As Xornadas de Folclore derón onte o pistoletazo de saída a dez días de festa, nos que seis grupos procedentes de Arxentina, Xeorxia, Chile, Ucraína, Filipinas e Irlanda do Norte “encherán de vida o rural”, cos seus bailes e músicas tradicionais.

Cerimonia de inauguración das Xornadas de Folclore. | Lucía Otero

Coa bandeira dos seus respectivos países e vestidos coas traxes tradicionais. Así foi como onte os grupos participantes nas Xornadas de Folclore deron por iniciada a 40ª edición do festival —agás Filipinas, que por mor e horarios de chegada non puido estar—. O Centro Cultural Marcos Valcárcel acolleu a típica e colorida cerimonia de inauguración que supón o pistoletazo de saída dos dez días que as agrupacións folclóricas estarán “enchendo de vida o rural”.

Preto de 200 artistas, pertencentes a seis formacións procedentes de Arxentina, Chile, Filipinas, Irlanda do Norte, Ucraína e Xeorxia, percorrerán distintos puntos da provincia para achegar os seus costumes a través da danza e a música.

Os asistentes ao acto desfrutaron da mestura de culturas. | Lucía Otero

Ata o próximo 21 de agosto as agrupacións Huayra Muyoj (Arxentina), Ballet F. Municipal de Rancagua (Chile), Phicas of BC (Filipinas), Royal Tara Dance Academy (Irlanda do Norte), Folk Dance Ensemble Volynianka (Ucraína) e ‘Tsumu’ (Xeorxia) despregarán en 16 vilas ourensás un abano das músicas e bailes tradicionais dos seus países, en horarios de 20:30, 22:30 e 23:00 horas. Os concellos de Allariz, A Rúa, Bande, O Barco, O Carballiño, Castro Caldelas, Celanova, Entrimo, Maceda, Manzaneda, Ribadavia, Trives, Verín, Viana do Bolo e Xinzo de Limia, xunto coa capital, serán os anfitrións deste percorrido cultural.

Esta cita co folclore de diversas partes do mundo está organizada pola Deputación de Ourense, a través do Centro de Cultura Popular Xaquín Lorenzo, e conta coa colaboración da Consellería de Cultura, Lingua e Xuventude e dos diferentes concellos que acollen este evento.

A primeira cita das Xornadas na provincia será hoxe, ás 20:30 horas en Bande cos grupos de Chile, Irlanda do Norte e Xeorxia.