Vázquez Barquero: "Estiveron a enganar aos afectados todo este tempo"

O voceiro socialista, Ángel Vázquez Barquero, cualificou como "inaceptable" o xeito no que a Xunta tratou este proxecto para a cidade, como tamén considera "inaceptable que o alcalde non queira apoiar a manifestación" convocada pola plataforma PROCAP para a semana que vén.

Para o voceiro socialista é "sorprendente" que agora se informe de que os terreos onde se pretende desenvolver o proxecto "non dá para tantas camas", cando "quen fixo a proposta para construír neses terreos foi a Xunta.

"Dende o principio sabían que non se podían cumprir as peticións dos pais e que estiveron a enganar aos afectados todo este tempo"

Dende o PSOE enténdese que os pais de mozos con diversidade funcional "se sintan enganados" porque no mes de setembro se alcanzou un acordo "que non é o que a Xunta pretende desenvolver".

Así, Barquero recordou que os pais reclaman un centro terapéutico ocupacional, mentres que "o proxecto que está enriba da mesa é só ocupacional"; e que ante a petición dun centro "como o de Lugo" con 80 ou 100 camas, a proposta da consellería de Política Social recolle "pouco máis de cincuenta".