Xunta e Pereiro de Aguiar melloran a seguridade de varias estradas

Co obxectivo de mellorar a iluminación e a seguridade viaria na contorna de Monterrei e o Parque Tecnolóxico, así como as conexións entre Castadón (Pereiro de Aguiar) e Ceboliño (Ourense), púxose en marcha un importante proxecto de investimento nas estradas OU-536 e OU-537.

Beneficio a veciños e usuarios

O convenio de colaboración realizado entre a Xunta de Galicia e o Concello do Pereiro de Aguiar supera os 230.000 euros e beneficiará a veciños de Monterrei e a usuarios que frecuentan estas estradas.

Concibido para desenvolverse en dúas anualidades, Luis Menor, presidente da Deputación de Ourense e alcalde de Pereiro, agradeceu a colaboración da Xunta e puntualizou que este convenio supón unha cuestión de importancia co obxectivo de garantir a seguridade dos veciños e usuarios.

Punto estratéxico

Composto de dúas fases de execución, a primeira desenvolverase no presente ano para mellorar os servizos á cidadanía e a segunda no transcurso do 2026, que finalizará coa instalación da iluminación total da senda peonil da estrada de Monterrei C-537.

O reforzo á seguridade viaria devén nun aspecto clave, tendo en conta o constante tráfico nesta zona con arterias moi concorridas que conectan áreas clave como Castadón, o complexo de Monterrei e o Parque Tecnolóxico de San Cibrao das Viñas, un punto estratéxico do sector económico ourensán por ser unha zona de alta actividade industrial e comercial.

Eixe de mobilidade

Segundo o Índice de Intensidade Media Diaria (IMD) de Galicia, a OU-536, con 71 quilómetros de longo, rexistra un tráfico diario estimado en 14.000 vehículos. Mentres que a OU-537, con 3,96 quilómetros de distancia, cumpre unha función especializada como eixe de mobilidade laboral, cuxo IMD é de aproximadamente 7.000 vehículos. Esta función específica implica fortes horas punta e tráfico constante de transporte pesado asociado á actividade industrial, polo cal este convenio de colaboración repercutirá de maneira significativa na seguridade viaria no perímetro onde se executará o proxecto.