Lucenza, en Cualedro, volve á normalidade coas festas do San Ramón

AVOGADO DAS EMBARAZADAS

A parroquia de Lucenza, no concello de Cualedro, espera deixar atrás estas duras semanas a causa dos lumes coa celebración das festas na honra do seu patrón, San Ramón, avogado das embarazadas

Procesión do San Ramón en Lucenza, o ano pasado. | Cedida

O inicio das festas na honra do San Ramón de Lucenza terá lugar este sábado 30, ás 12,00 horas, coa misa solemne e a procesión da figura do santo, acompañados polos gaiteiros de Baltar.

Xa pola tarde, dende as 17,00 horas, detrás do local social situarase un touro mecánico e outras actividades pensadas para os máis pequenos, organizadas por Máis que Brincos.

A sesión de tarde-noite iniciará ás 20,30 horas, cunha verbena na praza da Penela que contará coa orquestra Costa Dorada, no marcoa da súa xira “Inolvidable Tour 2025”.

Domingo de actividades

O segundo e último día arrancará de novo con misa e procesión, desta vez acompañada pola charanga Nova de Trives, ás 13,00 horas.

Pola tarde, a partir das 17,00 horas, terá lugar un campionato de chave detrás do local social. Ás 19,00 haberá un xogo de pistas na Penela, “Coñeces Lucenza?”, e ao remate, festa coa charanga Nova.