Podcast Ciencia de Ida e Volta | Misterio no Pazo: teatro inmersivo e ciencia en Castrelos

Castrelos prepárase para unha tarde diferente. Este xoves, 9 de abril, o Pazo de Castrelos converterase nun escenario de intriga e ciencia coa obra ‘Misterio no Pazo’, unha experiencia de teatro inmersivo que mestura investigación, enigmas e contido científico. A iniciativa está organizada pola Unidade de Cultura Científica da Universidade de Vigo, en colaboración co Concello, e celébrase dentro do proxecto Ciencia de Ida e Volta, con financiamento da FECYT.

Ciencia, teatro e intriga

Como peche da celebración do Día Mundial do Teatro, a UCC+i lanza unha función extra de Misterio no Pazo, unha peza de teatro divulgativo e inmersivo para render homenaxe a Agatha Christie en colaboración co Concello de Vigo. Nesta ocasión, a representación estará dirixida a público familiar da Universidade de Vigo e aberta ao publico xeral.

A proposta dá continuidade ás actividades xa realizadas os días 4 e 5 de marzo de 2026, dirixidas ao alumnado de centros de educación secundaria da cidade de Vigo. Nesta nova sesión, a actividade ábrese ao público xeral e á comunidade universitaria da UVigo, co obxectivo de “maximizar o alcance da iniciativa e optimizar o aproveitamento do traballo artístico, técnico e científico previamente desenvuelto”, explican dende a Unidade de Cultura Científica.

A actividade desenvolverase no museo Quiñones de León e contará con dous pases consecutivos: un primeiro ás 17,30 horas e un segundo ás 18,30 horas, cun máximo de 50 persoas en cada sesión. O acceso realizarase mediante reserva previa a través dun formulario habilitado na plataforma Museos Educa, e a participación será de balde ata completar aforo.

"Un cadáver en la biblioteca"

A actividade presenta unha adaptación da obra de Agatha Christie “Un cadáver en la biblioteca”, en formato de teatro inmersivo con contido científico-divulgativo. A proposta combina acción teatral e probas científicas, nas que o público participa activamente para resolver un misterio.

A historia adapta a novela 'Un cadáver en la biblioteca', de Agatha Christie, e pon o público no centro da acción: quen queira descubrir quen asasinou a Ruby Keene deberá enfrontarse a probas e retos científicos, interactuar cos personaxes e desentrañar pistas para chegar á verdade.

Mónica Camaño interpreta á señorita Marple, a famosa detective de Christie. Pola súa banda, Tino Quintela, investigador da Universidade de Vigo, deixa por un momento o laboratorio para representar ao Marqués de Quiñones de León.

O museo municipal Quiñones de León será así o escenario dunha peza teatral na que o público participante terá un rol protagonista. Conducidos por Mónica Camaño, que fará o papel da Señorita Marple, personaxe icónica creada por Agatha Christie, as e os asistentes terán que realizar diferentes probas e experimentos ata descubrir quen asasinou a protagonista da obra, Ruby Keene, interpretada por Adriana Santos Muñoz.

Os investigadores Tino Quintela, Guillermo Blanco e André Vidal asumirán os papeis do Marqués de Quiñones de León, Mark Gaskell e Raymond Starr, respectivamente; mentres que a catedrática de Xenética Paloma Morán e a investigadora predoutoral Nerea Cazás encarnarán as doutoras Morán e Cazás. Pola súa banda, as técnicas da UCC+i e Víctor Martínez Mariño serán o persoal do servizo. O elenco complétase coa voz en off de Cristina Collazo (Josie), Zé Paredes (Basil Blake) e Manu Paino (Gastón). O espazo sonoro é obra de Marcos Paino.

Para a adaptación das probas creouse un equipo multidisciplinar integrado por diversos grupos de investigación da UVigo, cuxos integrantes, ademais de encargarse do contido científico da obra, asumirán tamén o papel de intérpretes. O estudantado, dividido en grupos, deberá colaborar co cadro investigador na resolución do caso a través de diferentes probas científicas.

Tres probas para identificar ao asasino de Ruby Keene

A primeira das probas centrarase na recollida de mostras de ADN, de pegadas e na análise toxicolóxica, nunha actividade deseñada polo grupo de Xenética Evolutiva e Conservación da Biodiversidade.

Outra das probas será a de Palinoloxía, coordinada por Celestino Quintela e Nerea Cazás, integrantes do grupo de Análise de Concas Sedimentarias do CIM. A través da recollida e estudo de restos de pole presentes na roupa das persoas sospeitosas, o equipo poderá detectar posibles incursións da natureza na escena do crime e achegar novas pistas que permitan identificar ao responsable.

A terceira proba xirará arredor do idiolecto e estará dirixida por Guillermo Blanco, do grupo Sistemas Informáticos de Nova Xeración. Co apoio do público, analizaranse as distintas formas de falar dos implicados para tratar de achegar luz sobre a autoría do crime. Coas conclusións extraídas dos distintos experimentos e coa colaboración da señorita Marple, os asistentes deberán reconstruír os feitos e descubrir quen foi o responsable do asasinato de Ruby Keene.

Unha segunda volta aberta a todos

Esta nova sesión está aberta ao público xeral e á comunidade universitaria. Con dous pases, ás 17.30 e ás 18.30 horas, no Museo Quiñones de León, e un máximo de 50 persoas por sesión, a actividade permite que quen participe se mergulle de cheo na historia e na ciencia, nunha combinación pouco habitual pero moi atractiva. A entrada é gratuíta, pero require reserva previa en Museos Educa.