Xullo despídese de Ourense con descenso de temperaturas

A fronte que chegou este venres á provincia deixaranos unha xornada de sábado marcada pola inestabilidade, en especial nas primeiras horas do día. O meteorólogo de Telemiño Diego Fernández explica que a xornada arrancará con ceos cubertos e nubes baixas, que se irán despexando segundo pasen as horas. Xa pola tarde, espéranse ceos despexados, en especial nas comarcas de Trives, Viana ou Verín.

En canto ás temperaturas, xullo despídese de Ourense cun descenso do termómetro. Así, as máximas non superarán os 25 graos, mentres que en Castro Caldelas ou Trives quedarán nos 19º. O descenso tamén afectará ás temperaturas mínimas, con marcas por debaixo dos 10º en varios puntos da provincia.