O Fiadeiro de Carguizoi, unha festa senlleira e recuperada

Os fiadeiros, segundo contan as persoas maiores da contorna, eran unhas festas que facían no Entroido. Unhas xuntanzas entre veciños nas que cada un achegaba o que podía, levaban tamén música con gaitas e pandeiretas e acudían os felos, aínda que non moitos xa que os traxes son caros e daquelas non o podía permitir moita xente. Segundo nos conta Carmen Iglero, unha das rapazas da organización, os traxes eran de alugueiro e prestábanos de uns a outros. “A idea naceu para distraerse das tarefas cotiás e xuntarse entre os veciños”, aclarou Carmen.

FOLIADA E PETISCOS

Este ano volverase repetir o de outras voltas, e este sábado, dende as 17:00 horas, estarán abertas as barras para empezar a troula e poden achegarse os músicos que queiran a animar o evento. “É unha foliada libre na que nós non lle pagamos nada, cada un vén tocar o que quere”, aclarou Carmen, “invitamos a comer e a beber tanto aos músicos como aos felos que veñan”.

O resto da xente ten bebidas a prezos populares para apoiar a festa e que poida seguir celebrándose, xa que todo o que recadan é para continuar facéndoo. Tamén venden unhas cuncas para que a xente beba por aí, “é un xeito de reducir a cantidade de plástico e a suciedade da aldea e poder seguir facendo o Fiadeiro”, rematou. 

O Fiadeiro de Carguizoi formalizouse en 2017 cando tanto os felos coma os veciños decidiron oficializar a festa e convidar a máis xente. Ese ano fíxose na palleira dunha veciña, que era onde agardaban por os felos para empezar a comer todos xuntos as bicas, tortillas ou empanadas, feitas polos veciños e que son típicas da contorna. “É un recibimento que se lle fai ós felos”, resumiu Carmen: “E eles fan o seu, soan as chocas, collen aos veciños para xogar e métense nas palleiras a bailar”.

Felos, petiscos, bebidas e música, os protagonistas da cita macedá

As últimas horas da tarde contan que aparezan os felos, pero coma sempre, “son unhas figuras imprevisibles e farán o que lles pete”, sinalou Carmen Igleto. “Cando chegan, os veciños abren as palleiras para que entre todo o mundo a bailar e desfrutar con eles, e xusto nese momento repartiremos uns pinchos de balde, como se facía antes e para manter o felo como protagonista da festa”, aclarou.

Os máis novos da aldea, que agora organizan a festa, adoitan disfrazarse de vellos durante o Fiadeiro para recordar á xente maior que o facía antes ca eles, e invitan a todos os asistentes a ir disfrazados do que lles apeteza, pero que vaian disfrazados.

Dende 2017 ata 2020 a festa foi crecendo e abríndose a máis xente. Durante a pandemia de 2020 foi o derradeiro ano antes de paralo, xa que durante 2021 e 2022 non se celebrou. En 2023 colleron as rendas os máis novos da aldea para axudar aos maiores que xa se lles complicaba facer tanta comida e atender a tanta xente. Durante ese ano, comezaron a facer publicidade en redes sociais e acudiu moita xente, polo que comezaron a cobrar as bebidas para poder afrontar os custes, xa que os petiscos, feitos por eles mesmos, continúan sendo de balde.