Seixalbo viaxou a outra galaxia xunto a Paquita e Nicanor

Abriu o Entroido de Seixalbo unha parella que sempre causa expectación. Os famosos namorados Paquita e Nicanor fixeron alarde da súa fama congregando a veciños e curiosos que non quixeron perderse o Domingo Oleiro como primeiro día grande. E, como xa nos teñen acostumados -salvo algunha excepción- fixérono na compañía do pequeno Vicentiño, que, coma todo fillo, ía entre os dous pais abrindo a comitiva.

Superaron a barreira da atmosfera a bordo do seu “pacamobil” e ataviáronse como ese universo que agardan conquistar máis pronto que tarde, mentres recorrían as rúas amosando os seus planetas, foguetes e satélites. Tiveron a súa recepción na Praza Barreiros, onde as persoas foran substituídas por extraterrestres, astronautas, e algún que outro despistado que preferiu vestir as súas mellores galas como animal, mago ou superhome. 

Foi -como outros anos- a charanga Sorcha a encargada de por ritmo e animar un ambiente que xa de por si partía a ritmo de festa. E non deixaron os incondicionais da zona un só espazo sen tradición entroideira. 

E seguindo esta mesma tradición, foi no corazón da zona onde tivo lugar o pregón, seguido do ansiado momento no que as olas -neste caso coma estrelas fugaces- voaron pola Praza Maior. Un núcleo ateigado de expectantes e xogadores que se lanzaron os obxectos ata que algunhas mans despistadas deixaron que caeran e romperan. Non foi este un motivo de drama, pois xa chegara o momento preferido dos cativos -e dos que non o son tanto-, cando caeran os doces das piñatas. E tamén bastante doce, a chocolatada que puido degustar a veciñanza nunha xornada doutra galaxia que terá que agardar, un ano máis, para volver a ver pasear á familia favorita dos veciños de Seixalbo.