Vinte edicións no desfile de Entroido organizado por Os Labregos

O Folión Os Labregos está de aniversario e quere festexalo por todo o alto. Para conmemorar os seus 20 anos de desfile, a asociación preparou un programa especial con actividades para todas as idades, desde os máis pequenos ata os maiores, convertendo a vila nun auténtico epicentro da festa tradicional.

A celebración arrancará o 22 de febreiro cunha tarde dedicada á cativada. Desde as 17,00 horas, a Praza do Concello acollerá actividades infantís durante dúas horas, dando paso á música da charanga A Felga de Maceda. A festa continuará pola noite coas actuacións de DJ You e DJ Sergito, garantindo diversión ata a madrugada. Ademais, a partir das 20,30 horas, os asistentes poderán gozar dunha cea popular con empanada, bolo preñado e bebida por só 5 euros.

O gran evento chegará o 23 de febreiro co tradicional desfile de folións e boteiros, que contará coa participación dunha ducia de grupos. A comitiva partirá ás 15,30 horas desde a Finca da Barreira, percorrendo as rúas ata chegar á Praza do Concello, onde a festa continuará co espírito e a enerxía que caracterizan ao Entroido.

Desde a organización destacan a ilusión con que prepararon esta edición tan especial e convidan a todos a sumarse á celebración: “Este ano quixemos celebralo por todo o alto e preparamos actividades para todos os públicos”.