A Xironda estrea as mázcaras polo Domingo de Corredoiro

Dúas das mázcaras que saíron onte na Xironda.

Se ben a saída das mázcaras da Xironda estaba prevista inicialmente para a tarde, as ganas de vestir o traxe e lucir a careta eran onte xa irrefreables tras todo un ano de espera, polo que un animado grupo de veciños adiantou á mañá a estrea do personaxe singular do seu Entroido.

Coas súas particulares caras, todo sorriso e faciana burlona, as mázcaras fixeron o que acostuman, correron coas chocas, branderon os látigos e deron por comezada de forma oficial a festividade local coa súa presenza.

Esta semana arrancarán o resto de celebracións, ao longo de catro días de troula e mázcaras marcados este vindeiro sábado pola elaboración colectiva do “Entroido”, unha enorme figura de palla con atributos masculinos, que o derradeiro día, o Martes de Entroido, será subastado e queimado.

Contenido patrocinado