A hostalería inclúe o caldo de Gloria no menú do 21 de febreiro

Máis da metade da oferta hostaleira da vila sumouse, un ano mais, a esta proposta que vén impulsando a Fundación Rosalía de Castro para celebrar o aniversario da escritora, contando en Celanova coa participación e colaboración da Fundación Curros Enríquez.

Durante toda a xornada, locais participantes incluirán, na carta do día ou coa consumición en forma de tapa, un caldo galego seguindo a receita plasmada por Rosalía no poema “Miña casiña, meu lar”. Para ambientar a degustación, a Fundación Curros Enríquez distribuirá entre os negocios participantes poemas de Rosalía de Castro para que a lectura da poesía acompañe nesta celebración e diverso material que proporcionará a Fundación Rosalía de Castro.

Foliada na lareira

A esta degustación incluirase, tal e como ven sucedendo nas últimas edicións, unha foliada na Casa dos Poetas onde os presentes serán testemuña da lectura do poema, a música da Banda de Gaitas de Celanova e o Grupo Lembranza Solpor e a degustación do caldo de gloria elaborado pola Asociación de Amas de Casa Ilduara. O acto, aberto a tódolos públicos, arrancará ás 20,00 horas.