Tributo a Castelao na Festa da Palabra

Este sábado 19 de xullo, a Insua dos Poetas, no Carballiño, convértese unha vez máis no gran epicentro cultural da provincia coa celebración da XVII Festa da Palabra, un evento que, neste 2025, estará dedicado á figura de Alfonso Daniel Rodríguez Castelao, coincidindo co 75 aniversario do seu falecemento.

A Festa da Palabra, organizada pola Fundación Insua dos Poetas, serve cada ano como espazo de recoñecemento para escritores, creadoras, entidades e colectivos comprometidos coa cultura e a lingua galega. ”Queremos que esta homenaxe a Castelao sexa de toda a provincia” suliña Luis González Tosar, presidente da Fundación. O acto central será a entrega dos Premios Insua dos Poetas.

Nesta edición dos premios, serán recoñecidos: o escritor e editor César Lorenzo Gil, polo seu labor crítico a través do blog Os Biosbardos; a xornalista e escritora María Xosé Porteiro, pola súa traxectoria a prol da lingua galega nos medios de comunicación; a histórica Editorial Galaxia, polos seus 75 anos de defensa activa da identidade galega; a Irmandade Sanitaria Galega, polo seu traballo en galeguizar e humanizar a atención sanitaria; o CEIP Plurilingüe Curros Enríquez de Celanova, polo seu compromiso coa educación medioambiental; o Cine Club Padre Feijóo de Ourense, pola súa contribución á difusión do cinema galego e universal durante máis de cincuenta anos, e Ramón Aguiño López, emigrante galego na Arxentina, pola súa participación cultural na diáspora.