A fábrica galega de IA estará especilizada no eido da saúde

O presidente da Xunta, Alfonso Rueda, destacou que a futura fábrica de intelixencia artificial 1HealthAI suporá un paso decisivo para consolidar Galicia como un nodo tecnolóxico estratéxico a nivel europeo. Será a factoría de IA máis especializada das 19 existentes en Europa, situando a comunidade nunha posición destacada no ámbito da innovación. O proxecto está liderado polo Centro de Supercomputación de Galicia (CESGA) e coliderado polo CSIC, contando con amplo respaldo institucional e científico.

A fábrica 1HealthAI especializarase na aplicación da intelixencia artificial á saúde humana, animal e ambiental baixo o enfoque One Health, promovendo unha visión integrada destes ámbitos. Conseguiu a terceira mellor puntuación entre proxectos europeos e mobiliza un investimento de 82 millóns de euros. Participan as tres universidades públicas galegas, o centro tecnolóxico Gradiant, o hub Datalife e outros axentes do ecosistema de I+D+i galego, español e europeo, reforzando o carácter colaborativo do proxecto.

Rueda subliñou que a adxudicación da fábrica para Galicia é un éxito colectivo, froito da cooperación entre administracións e entidades investigadoras, e marca un novo ciclo de innovación. Destacou que o proxecto xerará emprego cualificado, atraerá talento e ofrecerá aplicacións relevantes para o ámbito sanitario e ambiental, como apoio á vixilancia epidemiolóxica, predición de biotoxinas nas rías, avance da medicina de precisión e mellora da detección temperá de incendios.

Outro obxectivo será potenciar a competitividade de startups e empresas emerxentes, permitindo desenvolver solucións baseadas en IA con maior eficiencia grazas a capacidades tecnolóxicas avanzadas e acceso a datos de calidade. Rueda incidiu en que estes avances deben chegar a sociedade, pemes e tecido económico, garantindo un impacto transversal que trascienda o ámbito científico. No marco desta aposta pola tecnoloxía, o presidente destacou o potencial da intelixencia artificial e a necesidade de que Galicia se prepare para aproveitar as oportunidades que ofrece.